Огромно е задоволството да се поразговара со Илина Цветкова, архитектка која е длабоко инспирирана и посветена на својата работа во архитектонско студио во Чешка, каде работи на реобнова на стари објекти.
Нејзините гледишта за реадаптација на напуштени простори комплетно ни ја доловија визијата која ја има за себе на личен и професионален план.
Со неа празговаравме за повеќе работи, за нејзините хобија, за тоа како еволвираат нејзините проекти, за тоа кои софтвери ги користи итн.
Илина, би сакале да знаеме нешто повеќе за тебе, со што сè се занимаваш и кое е твоето хоби.
Јас сум Илина, дипломиран архитект, моментално работам во архитектонско студио во Чешка каде што работиме главно на реадаптација на стари индустриски објекти.
Јас сум премногу љубопитна личност и токму таа љубопитност ме води во многу неочекувани ситуации и простори, а тоа ми помага во мојот развој како архитект.
Од пасии и хобија би одвоила велосипедизам, шетање и откривање на стари индустриски објекти и изнаоѓање начини како истите да се реактивираат.
Моите хобија се блиску поврзано со спознавање на нови места, градови и простори како и нивно реоткривање, и нивен запис преку различни медиуми како на пример поема, скица, фотографија, колаж, скулптура, цртеж и слично.
Французите имаат еден прекрасен поим ‘’Flâneur’’, талкач со којшто јас се поврзувам и често го применувам овој начин на разбирање и пронаоѓање на различни урбани потенцијали.
Која е позадината и што те инспирира да го работиш тоа што го работиш?
Тоа што моментално ме интересира се дефинитивно запуштените остатоци (leftovers) од урбаните средини и како истите се третирани.
Инспиративно е да видиш како едно парче руинирана архитектура од 19ти/20ти век може да се трансформира во современ објект со одредена програма која што ќе му служи повторно на човекот.
Ме инспирираат приказните и историјата што секој напуштен и руиниран фрагмент од градот го носат со себе. Градот го перцепирам како жив организам кој секојдневно трпи промени.
Така и архитектурата ја сфаќам, како можност на преплетување на минатото и сегашноста и создавање на платформа за подобро општество.
Тоа подразбира дека многу пропаднати објекти може да станат нечие идно домување, културно-интерактивен објект, уметнички простор, креативни работни простори и слично.
Во проектите за реобнова на стари објекти треба да се внесе многу креативност, логичност и отвореност за нови идеи, а тоа е она што мене ме инспирира во мојата работа и желба за успешна реализација на проектот.
Каква архитектура најмногу ти се допаѓа? Што мислиш за македонската?
Не би можела да бидам категорична и да кажам дека само еден тип на архитектура ми се допаѓа.
Тоа е исто кога некој би ме прашал кој жанр на музика да изберам, што автоматски отежнува да се најде одгoвор.
Има убавина во секој стил на архитектурата, останува на нас како професионалци да ги препознаеме квалитетите и недостатоците од истата и да пробаме од наученото да ги имплементираме во современ јазик.
Сепак, го преферирам индустрискиот и футуристичкиот стил.
Тие секогаш ме инспирираат со нивните идеологии, естетика и слобода на интерпретација.
За вистинската македонска архитектура можам само да кажам дека е брилијантно поклопување на традиционалното и модерното и е основа која треба ние помладите генерации на архитекти да ја надградуваме.
Која е твојата цел на личен и професионален план?
Едното без другото не функционира. Кај мене особено поврзани се архитектурата и личниот живот така да цел ми е еден ден самата со помош на други креативни лица да основаме и да работиме заедно на реадаптација на напуштени простори каде што со партиципативен начин на работа ќе направиме едно културно збиралиште на млади со храбри, решителни идеи и иновативни програми.
Како еволвираат твоите дела и твојата работа со текот на времето?
Тие еволвираат периодично и многу зависат од моменталниот проект на кој што работам.
Ако се навратам на работите кои што ги работам и ги имам работено би рекла дека почетоците беа многу поапстрактни и идеите поутопистички но како полека се градам професионално и лично, проектите добиваат и обработуваат реални проблеми. Секако се адаптирам и на новитетите што се случуваат низ светот.
Како е да си артист во време на NFTs?
Да се биде артист во време на NFT секако си има свои добри и лоши страни.
NFT генерално не се концентрира толку на делото туку повеќе функционира како дигитален сертификат на уникатност или поседување на делото.
Артистот може да бенефицира од тоа што нема да биде зависен од ниту една институција или критериуми па така ќе може да направи повеќе профит од делото за разлика во реалниот свет.
Добрата страна на NFT е што никогаш нема да се изгуби трагата на оригиналниот газда на делото без разлика колку пати е препродавано.
Имајќи го сето ова во предвид, мислам дека NFT има предвидлива иднина во дигиталната уметност, сепак многу работи би требало да се подобрат.
Моментално, повеќе е препуштено на инвеститорите и на идејата како да се направи профит отколку да се земе во предвид квалитетот на изработката на едно дело. Па така, можеби во иднина доколку професионални куратори или уметнички експерти би биле инволвирани и едуцирани за тоа како фунционира NFT светот, може да отвори можности за поширока публика од кои што вистинските уметници и љубителите на уметност ќе бидат дел од неа и ќе имаат бенефит.
Кој е твојот проект од соништата?
Проект на соништата не може да биде еден проект. Lina Bo Bardi ми е голема инспирација и работам на тоа да остварам интервенции од тој тип но со мои видувања. На пример, напуштени фабрики, магацини, складишта и слично може да се претворат во мултикултурни центри каде што човекот ќе може да ги искористи на неконвенционален поинаков начин и да ги оживее просторите кои некогаш имале сосема друга функција.
Како Photoshop ти помогна во твојот професионален развој?
Инстантна атракција! Кога почнав со Photoshop, ми овозможи моќ за прецизно доловување на приказната, идејата и атмосферата на секој мој проект. Ова не е корисно само во архитектурата туку и за други креативни гранки во уметноста.
Дали твојата креативност се разви со користењето на Photoshop?
Би рекла дека Photoshop е супер алатка за реално изразување на мојата идеја и креативност.
Кои други софтвери ги користиш за изработка на твоите дела?
Photoshop и Illustrator за средување детали и визуализации, Rhino за 3D моделирање, Revit за техничкиот дел од проектот, Lumion и Enscape за визуализации и секако InDesign за комплетирање на презентации.
ПРИЈАВИ СЕ НА ОБУКАТА ЗА ДОРАБОТКА НА АРХИТЕКТОНСКИ ЦРТЕЖ СО КОРИСТЕЊЕ НА PHOTOSHOP + ИЗРАБОТКА НА АРХИТЕКТОНСКО ПОРТФОЛИО.
ЗАПИШИ СЕ НАЈДОЦНА ДО 25ТИ АПРИЛ!
