Фросина, кажи ни нешто повеќе за себе, кои се твоите интереси, кое е твоето хоби?
Фросина, 24/7 мајка, архитект со пасија за готвење и шетање по планини.
Собирам тапи од пива како хоби 🙂
Извидник сум во душа, иако предолг период веќе сум неактивна (тоа треба да се поправи).
Која е позадината и што те инспирира да го работиш тоа што го работиш?
Сестра ми се запиша на архитектура и затоа што таа ми беше идол морав и јас 🙂 Шала на страна многу ми се допадна односот и дружењето што сестра ми го имаше со факултетската екипа и сакав и јас.
Магистерската теза ми беше на самоодржлива и самодоволна архитектура, тоа ми е нешто што сонувам да го работам. За жал предалеку сме од тоа, но не значи дека не треба да целиме кон таа идеја.
Ме инспирира самата архитектура, луѓето за кои ја проектирам и во најново време колегите од Америка. Никогаш не сум помислила дека некој човек односно фирма/тим можат да те инспирираат и да ти отворат толку нови видици.
Каква архитектура најмногу ти се допаѓа? Што мислиш за македонската?
Сакам модерна архитектура, не сакам заоблени структури. Најмногу уживам кога проектирам мали станбени куќи за едно семејство, има нешто магично во целата интимност која ја има помеѓу проектанот и клиентот, најмалку сакам да проектирам станбени згради каде инвеститорот е “главниот врховен бог”.
Не знам за која македонска архитектура зборуваме… Генерално сме во многу лоша ситуација… Има некои прекрасни објекти сами по себе, но според мене односот на околината со објектите и обратно е она што ја прави архитектурата архитектура, а тоа не знам дали го имаме некаде во последно време.
Која е твојата цел на личен и професионален план?
На личен план целта е да останам што е можно понормална во ова ненормално време, станав мајка и сопственик на фирма во Ковид периодот и тоа се одрази баш јако на моето целокупно ментално здравје 🙂
На професионален план би сакала да ги зајакнам соработките со проектантските бироа од странство бидејки има мнооогу што да научам од нив и да се зачувам себе и моите вработени од „burnout“ кој е многу модерен во денешно време.
Како еволвираат твоите дела и твојата работа со текот на времето?
Како не знам 🙂 но супер е дека кога ќе си погледнам постари проекти, знам што би можело да е подобро. Во работата сум секој ден поефикасна особено со менаџерските активности во однос на водење на фирма бидејки за тоа баш никој не нè подготвува. И тоа е така една убава нагорна линија што си доаѓа со самото искуство.
Кој е твојот проект од соништата?
Пригратска населба, самоодржлива и самодоволна.
Како Revit ти помогна во твојот професионален развој?
Revit почнав да го учам бидејки сакав да си одам од Македонија и видов дека сите фирми во Европа го бараат. Го завршив курсот, не отидов никаде и паузирав од Revit.
По неколку години еден од клиентите за кого работев ми кажа дека нивната фирма ќе започне со работа во Revit, јас кажав сум била на курс, но не го користам, ама дека би сакала да пробам. Со книгата до мене, со туторијали на интернет, полека, полека беше нацртан првиот проект. Сега работам за три американски фирми кои работат исклучиво во Revit.
Кои други софтвери ги користиш при работа на твоите проекти.
AutoCad, Photoshop, CorelDraw.
Запиши се на нашите обуки за REVIT BIM и Rhino + Grasshopper и совладај ги најбараните софтвери во индустријата!
