Ангела Лековска е креативна архитектка чија пасија кон архитектурата и фотографијата е лесно воочлива кога ќе го посетите нејзиниот Инстаграм профил. Низ фотографиите сигурно веднаш ќе ја забележите нејзината инспирација од бруталистичката архитектура, како и интересот за користење на Illustrator и Photoshop за изработка на дигитални илустрации.
Ангела, кажи ни нешто повеќе за себе, со што сè се занимаваш и кое е твоето хоби.
Моментално студирам архитектура на магистерски студии, така што главна пасија ми е архитектурата, но имам голем интерес во сите сфери на уметноста. Преку факултетот, дознав дека големо задоволство ми причинува фотографијата, преку која можам повеќе да се фокусирам на одредени детали од градбите, како луѓето користат одредени простори, основните нивни навики и дневни случувања во градовите, природата, итн. Исто така, преку изучувањето на разни програми при изработката на финални визуализации на проектите, го дознав мојот голем интерес кон користењето Illustrator и Photoshop за креирање на лични дигитални илустрации, кои за мене претставуваат простор каде можам да го ослободам стресот кој го креира архитектонскиот факултет.
Која е позадината и што те инспирира да го работиш тоа што го работиш?
Инспирацијата доаѓа од повеќе страни. Најпрво ме инспирира моќта на архитектурата да креира простори кои ги раководат навиките на луѓето во нивните домови и надвор од нив, моќта на создавање простори кои ја комплементираат и истакнуваат нивната средина. Ме инспирира фактот дека архитектурата ја има можноста да ги реши нашите проблеми, да создаде простор каде ќе се чувствуваме удобни, исполнети и инспирирани.
Каква архитектура најмногу ти се допаѓа? Што мислиш за македонската?
Мислам дека голем удел во изборот на мојата кариера имаше токму македонската архитектура, поконкретно бруталистичката архитектура во Скопје. Растењето во близина на Порта Влае, и секојдневното поминување низ јавните простори кои даваат максимална слобода во нивно користење, додека огромни масивни скалести волумени висат над тебе, ми има оставено значителен впечаток. Затоа денес, секогаш има нешто во бруталистичката архитектура што ме влече, како скулптуралната слобода, монументалноста, масивните размери и нивната утописка, мистична природа. Меѓутоа, можеби една од моите најомилени градби во Скопје е зградата на МАНУ, токму поради тоа што е бруталистичка интерпретација на елементи од традиционалната македонска архитектура.
Која е твојата цел на личен и професионален план?
Како што спомнав погоре, моментално сум во завршната фаза од моите магистерски студии, односно работата на магистерската теза, така што во блиска иднина, целта е да ги завршам успешно моите студии и потоа да работам на проекти кои би направиле вистинска промена во градовите и значително би придонеле во подобрување на средината на една заедница.
Како еволвираат твоите дела и твојата работа со текот на времето?
Иако архитектонскиот стил што најмногу ме влече е брутализмот, користењето на бетон има последици за нашата средина. Во текот на моите студии, при изработка на повеќе проекти, почнав да употребувам дрвена конструкција, бидејќи сметам дека технологијата на дрвото како конструктивен материјал е во интензивен процес на развој и има огромни бенефити. Така што би рекла дека моите дела сè повеќе еволвираат од бетонска кон дрвена конструкција.
Како е да си артист во време на NFTs?
Искрено, не сум премногу запознаена со NFTs и целиот бум кој што се случува околу нив.
Кој е твојот проект од соништата?
Секој проект со себе си носи разни ограничувања, конструктивни лимити, конкретна замисла од клиентот, фиксиран буџет, проблеми при процедурата на реализација, кои го прават истовремено покомплексен но и поинтересен, бидејќи колку е потежок проблемот кој ќе се реши преку архитектонски елементи, толку е позначаен проектот. Меѓутоа, мојот проект од соништата би бил дизајн на куќа со апсолутна авторска слобода, без економски ограничувања, едноставно креативна можност да се искористи знаењето стекнато од изучувањето на мастерите по архитектура во создавањето на уникатни простори кои би го подобриле начинот на живеење.
Како Photoshop ти помогна во твојот професионален развој?
Photoshop, како и останатите програми од Adobe, конкретно Illustrator и InDesign се програми кои секојдневно ги користам, ми имаат помогнато многу во завршната репрезентација на проектите, која сметам дека е исто толку важна колку и самиот проект. Овие програми се клучни за комуникацијата на тоа што сакам да го доловам преку мојот дизајн, која ќе биде разбирлива за тие што се во доменот на архитектурата и за оние кои не се.
Дали твојата креативност се разви со користењето на Photoshop?
Да дефинитивно. Преку Photoshop може да се биде максимално креативен и експресивен, и преку експериментирање на разни стилови на репрезентација, може да се пронајде оној кој најмногу ќе прилега на проектот и најдобро ќе ја искаже идејата позади дизајнот, без разлика дали станува збор за основа, изглед, пресек, колаж, дијаграм или визуализација.
Кои други софтвери ги користиш за изработка на твоите дела?
Како прва програма морам да го спомнам AutoCAD, потоа користам SketchUp за брзо подигнување на волуменот и проба на некои елементи во 3D, но доколку сакам подетална и попрецизна изработка во 3D користам Revit. За финални репрезентации користам Photoshop и Illustrator, и на крај за layout користам InDesign.
Пријави се на обуката за доработка на архитектонски цртеж со користење на Photoshop + изработка на архитектонско портфолио.
Запиши се најдоцна до 25ти април!
